yaad-e-raftgaaN Mohsin

Kabhi jo cheirr gaee yaad-e-raftgaaN Mohsin
Bikhar gaee hain nigaahein kahaaN kahaaN Mohsin

Hawa ne raakh urraai to dil ko yaad aaya
K jal bujheeN mere khwabon ki bastiyaaN Mohsin

Kuch aaise ghar bhi miley jin mein ghoogatton k iwaz
Hui hain dafn dopatton mein larrkiyaaN Mohsin

Khandar hai ehd-e-guzishta na chhu na chheirr isey
Khulein to band na hon is ki khirrkiyaaN Mohsin

Bujha hai kaun sitaara k apni aankh k saath
Huey hain saare manaazir dhuaaN dhuaaN Mohsin

Nahi k us ne ganwaaye hain maah o saal apne
Tamaam umr katti yoon bhi raaegaaN Mohsin

Mila to aur bhi taqseem kar gaya mujh ko
Sameittna theeN jisey meri kirchiyaaN Mohsin

Kahin se us ne bhi torra hai khud se rabt-e-wafa
Kahin se bhool gaya main bhi daastaaN Mohsin